JET AIRWAYS CABIN CREW LÂK A NI LEH DÂWN TA

“Mizoram Youth Commission-in Language and Aviation Training kan buatsaih tûr hi a ṭha thei ang bera kalpui kan tum avângin Mizoram ṭhalaiten seat pawh rawn inchuh hial tlâk tûrah kan ngai a ni.”

-Joseph Lalhimpuia, Chairman, Mizoram Youth Commission

Date 20.2.2018 : Mizoram Youth Commission (MYC) leh Jet Airways te’n thawh hona an lo neih tawh ṭhin angin March 27, 2018 khian Aizâwlah Jet Airways-a thawk tûr Cabin Crew lâk a ni leh dâwn ta a; hemi atâna Mizoram ṭhalaite lo buatsaih lâwkna (Grooming/Pre-Recruitment Training) Language and Aviation Training chu Mizoram Youth Commission chuan anmahni Office-a an Training Hall-ah ni 26.2.2018 aṭanga 26.3.2018 thleng, thla khat chhung awh an buatsaih leh dâwn tih Pu Joseph Lalhimpuia, Chairman, Mizoram Youth Commission chuan a sawi.

MYC Chairman Pu Mâhima chuan, “Cabin Crew lâkna tûra Mizoram Youth Commission-in training kan buatsaih tûrah hian Training Hall Seat capacity kan neih zât mi 150 kan la ang a, duhsak zâwngte la loin, ‘First come, first serve,’ hmangin registration/enrolment kan ti dâwn a; Spoken and Aviation Training kan buatsaih tûr hi a ṭha thei ang bera kalpui kan tum avângin Mizoram ṭhalaiten seat pawh rawn inchuh hial tlâk tûrah kan ngai a, mi thiam tak tak (Trainer/Expert)-in an enkawl dâwn a ni,” a ti.

Mizoram Youth Commission hian hun eng emaw ti aṭang khân Jet Airways leh Spicejet nên thawk hoin Mizoram ṭhalaite tân Cabin Crew leh Ground Staff lâkna an lo nei tawh ṭhîn a; hetiang atâna Mizoram Youth Commission-in a lo buaipuiho, an hnên aṭanga Mizo ṭhalai lâk tawh zât pawh kum 2014 – 2017 chhûng khân Cabin Crew mi 30 leh Ground Staff mi 4 – an vain mi 34 an ni tawh a ni.

Jet Airways-a thawk tûr Cabin Crew lâkna tûra Language and Aviation Training neih duh tâna Eligibility Criteria leh hriat tûr pawimawh ṭhenkhat chu hêngte hi a ni :-

1. Age : Kum 18-27 inkâr.

2. Height : Mipa 5’7″ leh hmeichhia 5’2″ aia hniam lo an ni tûr a ni.

3. Weight : Mahni sân zâwng nêna inmil tâwk.

4. Physical features, etc. : Pian ṭha, hmêl hmuh nuam, hmai bawl lo leh mâm ṭha, hmaia arngêng hnuhmâ leh ser awm lo, tattoo nei lo, mit ṭha pângngai, mi biangbiak leh mi chhâwn thiam tak.

5. Educational qualification : HSSLC leh a chung lam pass (Kum 2018-a HSSLC exam tûr/result nghâk tân dîl theih a ni bawk).

6. Marital Status : Nupui/pasal la nei lo.

7. Nationality : Indian.

8. Passport size thlalâk : 2 copies.

9. MYC-a Training fee : Free

10. Registration dîlnaa document thil tel ngaite : MYC Office, AIS Transit Accommodation Building (2nd & 3rd Floor), New Secretariat Complex, Near MPSC Building, Aizawl-ah dîlna form siam sa dah khatin theh luha registration/admission tih nghâl theih a ni ang a; Class X leh Class XII Certificate xerox copy attest sa leh Passport size thlalâk copy 2 theh luh tel tûr a ni.

11. Registration tih theih hun chhûng : Ni 21-24 February, 2018

Mizoram Youth Commission Chairman Pu Joseph Lalhimpuia chuan Mizorama District khawpui tinah Youth Summit huaihawt tûr leh Aizâwl leh Lunglei khawpuiah IIT-JEE/NEET Coaching Class (Crash Course) buatsaih tûra chak taka hma an lâk mêk thu a sawi bawk a; chubâkah, University Grants Commission (UGG) pawmpui University aṭanga pass chhuak Gold Medalist-te chu lawmpuina leh chawimawina pawisa fai pêk an nih tûr thu a sawi nghe nghe bawk a ni.

-Mizoram Youth Commission (MYC)

(Date 20.2.2018)

Please wait...

Subscribe to hnaruak.com

Want to be notified when our article is published? Enter your email address and name below to be the first to know. (Hna thar awm apianga hriattir nih i duh em? I duh chuan i email address leh hming a hnuaia form ah type lut rawh le.)
Skip to toolbar